論「美股反彈嘅迷思」

我覺得Joshua Brown所提出嘅「非線性思維」/Anchoring effect嘅原因唔能夠全面咁解釋到點解股價會由$40去到$70，頂多只可以解釋到反彈到$42/$47既分別，升穿$50係有另外嘅原因。

簡單嘅諗法就係無限QE嘅影響，導致未來優質資產將會大幅價格上升。試想想，若果一層價值1000萬既樓，由於疫情關係，預計短期內會跌落去800萬；另一方面亦因為QE嘅緣故，預計10年後會升到去2000萬。雖然疫症會持續一段時間，但係相信都係有限嘅時間（當住佢兩至三年），但係QE嘅影響係睇唔到完結嘅時間，所以可以相信有資金嘅人士會偷步入貨：因為無論你層樓跌咗落去800萬，還是升咗上去1200萬，只要投資者肯定QE嘅影響冇咁快移除，都一定會入市買資產。

同樣地，呢個亦都解釋到點解盈利未返嚟嘅情況下，估值爆升，甚至破埋咁耐以來嘅高位。依家已經唔只係利息向下，搞到所有DCF/DDM等等嘅估值方法出現改變，直頭係錢嘅根本價值出咗事，搞到有錢人要即刻尋找優質資產去park cash。