牛市熊市兩極化

其實今年個市，話易炒定係難炒都得。正當指數仲係負雙位數嘅時候，其實大部份嘅中港基金都有正雙位數。今年除咗IT、醫療、物管、消費係大牛市之外，差唔多其他行業全部都係熊市。除非你好似路飛做吓板塊輪動，但係講真今年板塊輪動比以往更難、時間空隙短、回報亦都比較細。幸好，路飛個盤同大部份中港基金都拍得上。

去到六月尾，回報有返咁上下，但係見到嚟緊嘅風險越來越大，所以開始將注碼減少，減低倉位嘅波動性。仲記得當年係上海嘅時候識咗個term叫bi sha (“比傻”)，就是講去到牛市三期，大家明知啲嘢好貴，但係都鬥傻鬥勇，因為FOMO (fear of missing out)。而家呢個情況，資金泛濫但係投資機會少，所有錢都湧晒去同一個地方（散戶買，機構投資者買，ETF都買），造成非常crowded trade。唔係話聽日即刻爆煲，但係風險真係大左，值博率因此降低。

其實有唔少負面因素將會慢慢浮現：
1）第二波疫情嘅新增個案
2）香港國安法嘅結果
3）第二季業績公布
4）基金嘅Rebalancing

Fed一直頂住美國市，引伸頂住全球股市，能否完全將以上負面因素抹去？