汰弱留強

自從我哋減完倉之後，呢幾日嘅市場都處於弱勢：唔單止有弱勢行業比大市更加弱嘅情況，有一半強勢行業都開始出現疲弱。當然呢個同月尾嘅rebalancing可能有關，但正如上一篇文章提到，嚟緊嘅負面因素/風險越來越大，所以我哋都係採取比較保守嘅打法。

第一，我哋汰弱留強，係最強嘅板塊入邊都要作出選擇：減內房、減物管、減消費、減IT，只係保留醫藥同埋太陽能板塊。

第二，我哋兩日前買咗7500，主要唔係為咗對沖現有股票，因為對沖唔到，而係對指數成份股有負面嘅睇法。

幸好，雖然今日升跌比例大約係2:8，篩選過後餘下重倉嘅公司都表現得唔錯：康龍化成（3759），愛康（1789），信義光能（968），隆基（601012）今日竟然都有>5% 嘅升幅，照起咗成個盤，令我哋有條件睇多一兩日，睇清楚市場嘅方向。