今日開市之前已經準備好買內房，原因係六月份嘅銷售做得非常好，之前五月已經做得唔錯，但係有埋六月嘅數據就更加肯定，同埋放假嘅時候見到A股內房升得好犀利，相信香港都會跟返。主要都係集中掃中型內房：融創（1918），奧園（3883），旭輝（884），禹州（1628），美的（3990）。買完之後發現有啲唔對路，連大型內房都升，有啲spread out嘅感覺，跟住見到證券都係同樣情況，即時嘅反應係「買內險」。所以10:00am 前已經買內房內險內證卷買到七七八八。
午飯之後，見到增長股開始回調，但係value股繼續衝上去，認為今次嘅板塊輪動比上次更加強勁同實在。同時由於增長股真係crowd得太犀利，所以我哋都開始take profit，將value同growth嘅比例去到1:1。
交代返少少國安法前嘅部署，buy on rumour sell on news，我哋喺7月1號之前沽哂啲7500，調返轉買入香港股票（e.g. 10，11，12，16，823，2800），因為認為境外投資者（環球同國內）會喺國安法之後對香港增加信心（雖然香港人唔係太開心），諗返轉頭其實可以買7200，而唔係2800（多謝朋友提醒！）
今次輪動可以持續幾耐，暫時木宰羊，要等子彈飛一陣先confirm。
其實諗返轉頭，今次早少少開始減倉take profit都算係一個好嘅選擇，因為咁先有cash直接買貨，唔使等下晝食完飯之後先沽growth買value。
（注：大家盡量唔好跟得我太貼，因為好多時候我嘅部署都轉得好快，而出文嘅時間成日都delay，又唔會提示幾時走貨，所以大家都係參考下就好啦）
弩飛投資 