我好鍾意踢波，而通常都係集中用右腳傳波射波，隊長成日都好唔滿意，要求我用晒兩隻腳「左右開弓」，咁樣球技先可以再進一步。其實都係，雖然80%嘅時間都可以用右腳，但係剩低20%需要用左腳嘅時間通常都係好關鍵（e.g. 埋門射波，致命傳送）。
增長股就好似右腳，價值股就係左腳。增長股嘅好處，坊間大部份嘅財金人士都分享左唔少，但係價值股係某部份嘅時間，都可以發揮高回報低風險嘅作用。
價值股最優勝嘅地方，就係內在價值比較實在同埋容易計算，所以當資金流入嘅時候，就有一個清晰嘅reference point。更何況大部份嘅估值都跌到-1.5sd至-2sd，因此做一個低風險嘅反彈亦都唔難。當然，由於經濟前景唔好，通常市場比價值股嘅discount會相對sell side比嘅更加多。
因此，當兩日前一開始嘅時候，內房證券雖然已經升咗～5%嘅時候，我哋都不顧一切咁追貨。反而到咗而家當市場有多咗人談論價值股嘅時候，應唔應該再買入嘅問題就變得冇咁清晰。
