守住盈利再進攻

自從兩日前從內房內險證券跟紀律take profit之後，大陸政府亦都開始暗示唔希望股市升得太快。都係嘅，自從官媒話希望製造一個「健康牛」之後，上證用咗幾日就由3000點炒咗上去3300點（呢個都係其中一個原因路飛之前All in舊經濟）。其實，唔講嘅話反而更健康，講完就人人都貪心，健康牛都變瘋牛，絕對係人之常情（圖一）。所以，政府喺事情進一步惡化之前，打壓一下亦都非常合理（圖二）。幸好，今次買得狠，沽得更狠，保留到今次升浪超過九成嘅profit。

現時好多中港基金，都係滿倉新經濟（IT，醫藥，消費，物管），既然路飛個盤用舊經濟比新經濟追多咗4-5% alpha，所以沽左貨之後，當然要買返新經濟嘅股票。除咗尋日提到嘅科技股之外，我哋都入咗一部份嘅物管。雖然物管沉咗一兩個月，但係嚟到七月業績期，大家都希望搵啲盈利能見度高啲嘅公司，而正正物管現時嘅估值非常合理，所以呢一兩日都入咗足夠嘅注碼。

今次買物管嘅時候都有啲感慨，發現始終新經濟嘅流動性真係差咗啲，好難可以好似舊經濟咁樣一個價位就買夠自己要嘅貨，所以進攻同減倉嘅時候都要預早少少，同埋落嘅注碼相對比較低。但係留意番，我對新舊經濟係一視同仁，好嘅公司唔一定係好嘅股票，差嘅公司都唔一定係差嘅股票。