休息過後重新加倉

七月份喺第一個星期大升之後，基本上都係一動不如一靜，多做多錯，少做少錯。因此路飛今個月take profit之後，大部份時間都係揸住三成倉位左右，休息一下，同埋對有興趣嘅公司做更加深入嘅研究。眨吓眼，無論係新經濟同舊經濟，大部份都調整左10%-20%（雖然指數冇跌咁多），「瘋牛」嘅情況亦都降溫，波動性亦都下降，進入左可以開始買貨嘅範圍。

驟眼睇一睇watchlist，好多股票都調整返去合理價，非常抵搏！但係出擊之前都要過埋業績期呢一關，業績嘅好壞會直接影響嚟緊呢一季嘅資金流動，幸好用基本面去預先判斷業績都唔係太困難，只不過需要多點時間。例如：新東方在線（1797）之前炒得㷫烚烚，但係我哋睇到佢今季嘅收費情況，promotion strategy，老師增長情況，對手結構等等，認為2Q業績應該幾差，所以當佢突破$39向上之後就放咗大部份嘅貨。（呢啲時候，Momentum trading strategy就會出事⋯）

嚟到七月尾，有一部份投行開始將股票嘅目標價由Dec 2020推去Jun 2021。最吸引我眼球嘅係Jefferies，比起同行基本嘅修訂，佢近排推升醫療同IT股嘅目標價推得好誇張，成個BEst俾佢拉高左好多⋯（見圖）

In a nutshell，隨着美匯不斷向下，中港兩地嘅調整開始緩和，下個月嘅trading range暫定係25000-27000，所以我哋都將個倉位慢慢推上去六成左右。嚟緊最緊要睇緊資金會從美金流去邊度（金？債？新興市場？Bitcoin？）同埋公司業績會唔會滑鐵盧。