對於今日嘅大跌，其實都預咗遲早會嚟，話晒11月3號就係美國總統大選，特朗普係搞唔掂疫症、民調亦都落後嘅情況下，當然要搵中國做出氣袋。由之前關閉大使館到封殺TikTok，再到今次嘅WeChat，其實實質影響的確唔係咁大（或者咁樣講，現時資金非常氾濫，過往嘅「壞因素」嘅負面影響力會減弱左），但係就放咗一個好明顯嘅訊息：即使係雷聲大雨點小，特朗普都會不停搵嘢黎搞。
由於有「 特朗普要搵中國做出氣袋」呢個假設，所以路飛將七月至十一月嘅最高持倉量由130%降至80%，從而減低PnL嘅波動性。所以今日突然嘅下跌雖然係幾痛吓，幸好痛嘅程度未觸發到感性蓋過理性。
我會將今次嘅跌幅分為三部份：首先，由於不確定性增加，所以機構/專業投資者會先take一部份嘅profit（都有唔少對沖基金近排攞返20% cash左右）；第二，今次嘅消息令一部份嘅人想像美國對騰訊嘅制裁唔止係WeChat，而係會牽涉騰訊嘅其他有關聯嘅公司，所以快快脆脆沽咗先，因此跌幅開始蔓延去其他科技股；第三，11:30嘅時候，觸發咗好多自動平倉，同時間有唔少散戶cut loss/ take profit。
我哋冇大力追沽嘅原因，源自於12:06嘅時候嘅一個訊息「U.S. ORDER RELATES TO WECHAT, NOT OTHER TENCENT TRANSACTION」。若果特朗普決心完全破壞中美關係，美國冇需要出呢條訊息去搞清楚件事，所以我推斷特朗普主要都係想增加政治籌碼，但係唔可以去到好盡，因為下個星期仲有野要同中國傾。
弩飛投資 