相信大部份有金融背景/讀過CFA嘅朋友都知道Beta係量度資產受到系統性風險影響嘅指標。簡單來講，若果一隻股票嘅Beta = 2，當大市升1%，嗰隻股票理論上要升1% x 2 = 2%。喺讀書同做嘢嘅時候，我都經常用Beta去做估值、計算投資組合嘅風險等等，但係理論還理論，實際操作上Beta嘅概念用途不太大，仲可能有反效果，尋日就係一個好好嘅例子。
呢幾日新經濟股都處於弱勢，但係由於中長線都係睇好，所以好多人都鍾意用期指對沖大市嘅影響。但係問題就嚟啦，由於新經濟同指數嘅關聯度好低，好多嘅Beta都係0.6-1.0，用呢個去計delta exposure好明顯係錯晒。咁你用返近排嘅感覺去計，當嗰市跌1%嘅時候，近排嘅新經濟都跌4-5%，咁唯有用4至5倍delta去對沖，但係又出事。尋日朝頭早發現指數完全唔跌，但係新經濟跌緊4-5%已經有問題，到咗下晝，新經濟反彈少少，但係指數大升，造成雙輸嘅局面（有啲對沖基金會沽空弱勢指數股去fund新經濟股去做beta neutral）
In a nutshell，呢排都係減低注碼，因為操作嘅難度比較高（路飛都襯前日升500點嘅時候減多少少），寧願放棄大風險嘅盈利機會，等到低風險嘅時候先再入場。
弩飛投資 