香港繼續處於一個非常難投資嘅局面，睇返近一兩個星期嘅情況，會見到好多難玩嘅現象：出業績好過預期嘅升跌都係一半一半，同一個行業嘅股票嘅走勢唔同步(synchronise)。所以如果你每日係玩一兩隻股票，反而冇咁難，但係要揸住一個portfolio，除非你係基金逼住唔放貨，否則有波幅冇升幅嘅感覺都幾難頂。
市面上，見到好多人傾緊嘅問題係調整過後嘅新經濟股（IT，醫療，科技，物管）值唔值得再入。當大家喺度斟酌緊呢個問題嘅時候，其實要問下呢個問題問得啱唔啱。當普羅大眾對新經濟越嚟越有「認識」嘅時候，我開始見到投行近排開始傾緊新主題，當中所帶出嘅行業真係冇乜諗過。
舉個例，上星期有分析師提出電訊行業值博率好高，唔單止估值係2x EV/EBITDA (已經去到-2 sd嘅情況），佢哋估計政府可能會放寬對電訊行業嘅限制。所以雖然電訊行業嘅前景冇新經濟增長咁高，但係當你計埋估值加少少催化劑，個值博率就吸引好多。
所以，當全世界埋頭苦幹咁樣考慮緊同一樣嘢嘅時候，不妨轉一轉角度去思考問題嘅根本，可能會搵到更加多嘅機會！
弩飛投資 