疫情改變生活同營商環境

業績公布期過咗之後，我最大嘅感觸係今次疫情真係改變左人類嘅生活方法同埋商業環境。

好多人都有個謬誤，認為一間公司係處於一個靜止嘅狀態，所以股價升咗就覺得貴，跌咗就覺得平。呢個諗法只係適用於一啲成熟嘅公司，睇住個ASP/成本炒上炒落。但係當你睇咗好多增長公司嘅業績報告之後，你會發現喺三個月之內，成個中國變化咗好多。

中國人生活嘅改變：最明顯嘅係網購嘅使用，多咗好多人喺網上買FMCG，新鮮食品，家居用品；雖然每次訂單嘅總量細咗（少咗durables，多咗staples)，但係frequency提高左；老年人用多咗app，青年人打多咗機；多咗人去便利店，少咗人行shopping mall；化妝品嘅需求減低左，清潔用品嘅需求增加左。由於呢啲生活模式嘅改變，創造咗唔少新嘅商業機會。

商業環境嘅改變：舉個例，由於多咗人買FMCG，京東喚醒舊顧客嘅strategy突然加速，同埋佢嘅logitics加快收支平衡，令佢多咗錢去繼續投資。美團見到多咗人買菜，就搞咗美團買菜，可以填滿車隊嘅空閒時間（早午晚中間），加快達到一日賺一億嘅可能（現時每單外賣大約賺一毫子左右，而美團買菜可能將來會佔整體銷售嘅兩三成）。更有趣嘅係，之前一直認為主要嘅IT公司係win-lose嘅情況，但係由於市場大左，而家佢哋發現有可能可以共存（消費者可以同時擁有幾個app，根據唔同嘅需求去搵唔同嘅公司，所以與其攻擊對方，更重要係做好自己嘅segment），所以與其喺唔同公司入邊做選擇，不如買晒佢。

In a nutshell，呢幾個簡單嘅例子主要想講公司會隨着環境而不停改變，「貴」嘅情況唔一定係「炒」上去，有可能因為基本因素真係改變左。

（圖入面係McKinsey對中國消費者嘅研究，有興趣可以睇吓）