輸錢唔好咁快起翻身

今日開始頭幾個鐘，見到最強行業嘅龍頭股跌6-7%（例：物管嘅碧桂園服務、醫療器械嘅微創、IT嘅美團等），通常都唔係好現象，因為連呢啲優質股都放得，證明大家都比較審慎。

其實呢個保守嘅現象都唔係今日先見到：由上一兩個星期開始，見到投行同基金都減少持倉，同埋減少新經濟嘅比例，到近排A股嘅白馬股都開始俾人套現，Nasdaq走勢開始奇怪（睇埋今晚會更加肯定），路飛因此再將持倉減低，減到兩三成左右。

睇返九月份頭幾個交易日，新經濟股嘅走勢都幾差（圖一：IT；圖二：物管；圖三：醫藥），即使指數只係跌～3%，大部份新經濟股都跌緊10-15%。幸好路飛已經將物管/醫藥/IT差唔多全數清倉，剩低嘅只有最後還有信心嘅太陽能（其實係少啲人談論，相對比較安全啲）。

其實香港呢個市真係幾難玩，如果中美股市係一線股，香港就係二三線股，升就升得少過人，跌又跌得快過人（冇辦法啦，香港散戶嘅佔比又細，衍生工具又非常發達，導致長期小趨勢大波動嘅情況）。所以若果過一兩個月你賺咗錢，恭喜你；但如果你輸咗錢，唔使咁灰心，但係唔好咁快起翻身（呢句係全文嘅重點），將來永遠有更加好嘅機會。