100%-200%回報嘅太陽能行業

的確,太陽能係路飛今年最大Conviction嘅行業,因此無論市況如何,太陽能嘅持倉都一直堅持重倉不變(睇開路飛投資嘅都應該留意到)。由於持倉大、回報高,加上冇出出入入,所以都佔咗今年PnL嘅一大部份。

由於今年大部份投資者都係熱炒新經濟股(科技,醫藥,消費,物管),之前一直冇乜人提到太陽能,但係咁樣其實仲好,因為冇咁快變做crowded trade,可以「悶聲發大財」(由三月開始,股價慢慢斜線向上,調整幅度有限)。但係到咗近排,冇得再「悶聲」,越來越多本地同內地嘅基金/評論都開始提及太陽能行業,搞到股價開始爆升⋯

其實路飛睇咗太陽能行業已經一段長時間:由好耐之前信義光能(968)分拆上市,到興業太陽能(750)大升大跌,望住中國嘅太陽能政策又朝令夕改,導致唔少太陽能巨企輪流破產,所以太陽能一直都係「政策主導,高周期性」嘅行業,非常難投資。

但係隨着時間過,科技不斷進步加上原材料價格向下,太陽能發電終於去到cost parity嘅地步(即係同煤發電睇齊,which is 好大件事,因為成個基本面變晒,可以睇成game changer)。其實兩三年前有寄望過風電,但係風力始終係mechanical嘅嘢,所以功率嘅進步有限。水電都有睇過,但係選址非常有限(最靚嘅地方都已經俾長江電力(600900)揸住),所以增長空間都有限。另外,儲電嘅方法亦都進步咗好多,所以解決到夜晚冇太陽嘅問題(之前睇過好多有創意但係冇用嘅儲電方法,例如喺地下掘個窿,跟住用一舊又大又重嘅鐵去儲potential energy)。

到咗近排有Covid,本來有擔心環球嘅太陽能基建需求會唔會減弱,結果不跌反升,仲要不停提升目標需求量(中國同歐洲)。即使歐洲又再提議加返對中國出口太陽能產品嘅關稅,但係歐洲本地嘅太陽能產品始終唔夠競爭力,所以都要用返中國嗰啲。

In a nutshell,太陽能行業由於達到cost parity,所以行業已經進入拐點,由以前 「政策主導,高周期性」轉變為「需求主導,能見度高嘅高增長行業」

(利益申報:筆者自三月起持有大量信義光能(968)同埋隆基(601012))

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s

%d 位部落客按了讚: