炒返少少價值股

由「火中取栗」開始，呢幾日好多強勢股都變得比較弱勢，物管、消費、醫藥、IT都開始有跌穿上升軋嘅跡象。幸好，上星期已經大規模減新經濟股，所以下行嘅影響減少左2/3。

雖然減咗貨，但係都繼續有五六成倉位，主要係買咗銀行、保險同埋紙業，幸好今日都幫到手。本來預計今日出嘅GDP可能係催化劑，令到有板塊輪動嘅機會（增長 -> 價值），但係今日出咗嘅GDP差過預期之後，價值股嘅表現都普普通通。我原本嘅諗法係：GDP帶動銀行，銀行帶動上證，再由上證帶動保險，暫時個帶動都成立，但係唔係好強，所以睇多一兩日先。

紙業就好耐冇研究過，因為呢一兩年都oversupply，後尾而家先發現中國嘅負面政策可能反而有正面嘅影響：1）本來中國唔准入口舊廢紙，希望紙廠用返本地廢紙，結果下游直接入口紙張，反而拉高左出廠價；2）近排又叫啲紙廠改用燃氣做燃料，本來會增加成本，結果一啲比較細嘅紙廠直接out of business，變相減咗供應。仲有，順便可以賭埋人民幣。最受惠人民幣升嘅行業係航空、房地產同埋紙業，頭兩個都比較危險，得返紙業⋯

但係而家整體感覺都好差，嚟緊又出業績又大選，好多不確定性，所以都要睇到實一實，隨時變陣。