止蝕唔止賺

話說近排大市冇乜方向，所以唯有搵啲同大市相關度比較低嘅投資機會，當中有四隻係比較重貨：波司登（3998）、雷蛇（1337）、北控城市資源（3718）、祖龍娛樂（9990）。

對於呢四個投資項目，路飛都認為係高勝算同高賠率嘅，而且佢哋每個背後嘅storyline都唔同（有技術分析，有quant，有turnaround，有資金流），所以理論上佢哋嘅correlation比較低。

雖然預先認為係高勝算，但係世事豈能盡如人意，最後兩隻突破向上、兩隻突破向下（本來諗住至少三隻都應該突破向上），而係呢個時候，止蝕唔止賺就發揮佢嘅作用。

突破向上嘅波司登同埋雷蛇分別都有50%/30%回報（呢一兩日開始減倉take profit），已突破向下嘅北控同祖龍都幸好係5%內止蝕（佢哋仲要幾狡猾，下跌之前仲要有向上突破嘅跡象），止蝕後嘅走勢真係不堪入目⋯ 所以即使勝算得返1:1，止蝕唔止賺令到賠率去到1:6-10，可以令到整體操作處於盈利狀態。

但係我覺得「止蝕唔止賺」最難嘅唔係跟紀律操作，因為呢樣嘢係機械性而且客觀嘅，最難其實係搵到高勝算高賠率嘅機會。因為如果求其搵投資機會，當你5%止蝕/15%止賺（賠率1:3），你會發現長遠嘅勝算係3:1，而輸埋手續費同埋滑價。單靠「止蝕唔止賺」係唔能夠打破Law of Large Numbers嘅定律，所以去到最後嘅關鍵又係你有乜嘢Conviction。

（圖一：綠色係買入位，紅色係止賺止蝕位）

（利益申報：筆者繼續持有波司登同雷蛇）