拜登當選之後嘅部署

由拜登起初領先，到特朗普追上嚟，再到拜登贏番轉頭，上個星期每日嘅變化都幾大。路飛都有同朋友打賭究竟最後邊個會當選總統（但係贏咗選舉唔一定等於當選總統⋯中間可以發生好多奇妙嘅事）

Anyways，隨着選舉結果越嚟越明顯，步飛都做咗相應嘅部署，例如見到特朗普優勢增大嘅時候，會聯想華為同晶片嘅問題，所以即時沽左手頭上嘅中芯跟住買入小米（因為小米受惠於華為被打壓）。跟住拜登追上黎之後，就調返轉嚟買，買返最受中美貿易影響嘅股票，今次就選擇重倉中興通訊（763）。

除咗選舉，雙十一都有值得留意嘅地方：京東（9618）今次嘅表現做得好過阿里巴巴嘅淘寶（9988），佢嘅1P物流開始見到成效；波司登（3998）賣得好好，11月開始每日嘅增長超過100%（同上年同日比）；小米（1810）/雷蛇（1337）亦都係網上銷售都唔錯，所以都買咗一系列嘅雙十一相關股。

IT亦都有內部輪動嘅情況，見到唔少基金開始將大型嘅IT股take profit，將一部份放落去中型嘅IT股。其實佢哋唔係想take profit，但係之前買爆咗大型IT股，被逼需要減倉（例如mandate入面唔俾一隻股票超過10%)，資金今次流入去其他地方。例如：阿里健康（241），金碟（268），微盟（2013），有贊（8083）⋯

其實仲有好多其他主題：出口單有啲去咗中國，航運嘅情況改變左，11月尾嘅醫保競爭，內地嘅零售恢復人流，炒完電動車再炒supply chain⋯ 太多真係寫唔晒，再加埋路飛近排同Bloomberg既Help desk日日搏鬥，努力用BQL去自動化成套MM嘅選股方法，所以少咗寫嘢。

簡單啲來講，其實個倉位已經去返八成以上，但係其實倉位係幾多唔係最重要，反而係揸住乜嘢貨，有啲真係一隻頂十隻（例如路飛而家最重倉嘅竟然係雷蛇，上個星期$2.5放咗一半之後，$2.3-2.4慢慢追番，今日開車嘅結果真係不得了⋯）