年尾永遠係路飛最擔心嘅時間，因為每年呢個時候都係好多基金轉style嘅時間（將今年嘅PnL進行止賺，泊返落去指數股，或者放定落下年會炒嘅行業）。但係當中轉換嘅時間非常難掌握，因為好似音樂椅一樣，隨時都可以停。之前有試過12月最尾個星期先轉，亦試過11月頭已經開始做嘢。
由於今年大家喺新經濟賺嘅錢非常多，所以見到take profit嘅情況非常凶狠，一跌就跌8-10%，而呢個時候就係分別高低手最關鍵嘅時間：當佢跌第一棍嘅時候，將情況判斷為「調整」定係「出貨」，會大大影響今年最後嘅PnL（你會彎道超車，定係俾人追番轉頭，就係睇呢一下）。
其實，係呢一兩日之前，唔同嘅新經濟行業已經相繼出現take profit嘅情況，只不過係近排到IT，佢嘅市值同出名程度比較高，所以大家嘅感受特別深。睇返之前嘅行業：
1）物管：自從上一次出完業績，發現SOE嘅公司交唔到數，同埋開始對M&A嘅玩法提出疑問，之後有好多間二三線嘅物管跌到去三月底嘅價。
2）醫療器械：係帶量採購嘅影響下，由原先覺得「冇乜影響」去到「其實有影響」，發現行業嘅賽道冇想像中咁順暢
3）PD-1：近排有好多醫藥企業上市，由本來冇乜人關注，到今年個個都成為醫藥專家，隨着疫症成為日常生活嘅一部份，好多二三線嘅醫藥股都落返晒
4）IT：原本佢係最後一座城堡，但係出現咗「螞蟻金服」事件後，加埋政府政策嘅改變，投資者開始重新審視呢個行業。
5）醫藥ODM：其實佢先係新經濟最穩陣嗰個，但係你見到前面唔同嘅新經濟行業一個一個相繼倒下，依家對佢嘅前景打定個問號，相信都係合理。
弩飛投資 