跌到毁滅世界咁嘅樣

尋日大家都估新經濟向下嘅源頭係中國政府出政策影響IT公司，所以認為係一次性嘅調整，但係路飛一嚟見到尋日大跌嘅股票所涉及嘅範圍比呢項政策大，二嚟去到年尾，唔想將全年辛辛苦苦賺嘅錢輸番出去，所以決定減低exposure去到四成以下（今朝再減到兩成左右），但係減嘅時候其實未完全確定到情況⋯所以對錯都係要睇埋今日先知。

到咗今日行到一半，情況變得更加清楚，睇落有唔少嘅基金爭住放貨（特別係ATM)，泊番落去舊經濟，跌嘅全部都係今年賺得最多嘅股票（IT，醫藥，物管，消費），全部要錢唔要貨，升嘅係全部都係指數股，令你即使想用期指對沖去hedge beta都冇用（記得之前寫過篇文，提及而家買新經濟要去除市場風險，反而要買期指去hedge beta，同大學讀嘅嘢完全相反）。

其實今次痛就一定痛㗎啦，一刀斬落嚟，就將今次進攻嘅一半盈利斬走。但係其實遊戲啱啱先開始，今次嘅逃生門喺咁短暫嘅情況下，好多未放貨嘅朋友都會想襯反彈後放貨，減低暴險程度。根據過往經驗，少咗一半盈利嘅人，想等到盈利返嚟先止蝕，結果等到冇盈利；冇盈利嘅人，想等到有返少少盈利先止蝕，結果等到出現虧損⋯因此嚟緊嘅反彈會係關鍵。