喺不確定的市況，我係比較着重一間公司嘅防守力多過攻擊力，即係「水退嘅時候，就知道邊個係裸泳」嘅諗法。因為當大市情緒短期轉好嘅時候，大家都會瞇埋眼亂咁買，特別係買一啲近排跌得多嘅股票，導致好同唔好嘅公司都一齊升，所以比較混亂。但係當市場情緒唔好嘅時候，真正嘅強勢股會顯得特別強勁，因為有實力嘅投資者唔捨得因為短期嘅情緒將佢哋放棄。
所以近排當我做新舊經濟轉換嘅時候，係搵適合嘅舊經濟行業嘅時候，都特別小心，因為我需要等水退一兩次先確定邊啲行業嘅韌性比較高。
我近排好鍾意用Tesla Valve去比喻一間公司嘅買賣情況。Tesla Valve嘅設計係會令到一邊嘅水流非常順暢（圖一），但係水流掉轉嘅時候就有阻滯，而佢阻住嘅方法係用返水流本身嘅力量去阻返住自己（圖二）。
呢個情況同股票嘅買賣好相似，每次當趨勢去一邊嘅時候，都會有人做逆向嘅操作：升緊嘅時候有人沽貨；跌緊嘅時候有人買貨，Tesla Valve 嘅水流都會分開兩節，其中一節調返轉阻住主水流。而正正係市況掉轉嘅時候，我哋先睇得清楚逆向操作嘅嗰啲人嘅實力有幾強。所以，當一隻股票向上嘅時候，我會希望佢個「Tesla Valve」係比較弱勢，反之亦然。
近排嚟睇，匯豐渣打、內地證券、內地保險（人壽）嘅守勢做得唔錯，其實油都OK，但係內地房地產就麻麻地。新經濟近排每次嘅反彈都好勁，但係跌幅都好勁，所以同樣要睇多一段時間先決定佢嘅「Tesla Valve」有冇變化。
弩飛投資 