電動車淘金熱？

相信好多人都聽過淘金熱（Gold Rush）嘅故事，當全世界都一齊去掘金嘅時候，搵到金嘅淘金者當然開心，但係其實成功率好低，大部份嘅人都係空手而回，但係有人係呢個時候賣掘金用嘅鏟，反而搵到穩定嘅高回報！

所以面對近排嘅電動三寶：理想（LI）、蔚來（NIO）和小鵬（XPEV）股價創下新高，大家已經忘記晒所謂估值的爭論，雖然唔係太明白，但係喺市場面前都只能夠低頭。當全世界都炒緊電動三寶嘅時候，本來想寫有關電動車嘅文章，但係好快就發現市面上好多分析同研究嘅insight比我多好多，所以都無謂獻醜。

既然趕唔切去「掘金」，路飛唯有喺度諗緊電動車嘅「鏟」喺邊度，咁當然就係背後嘅supply chain。而家好多好勁嘅技術（Lidar嗰啲）都係晒美國上市，我冇美股account，唯有搵吓啲內地嘢：

寧德時代（300750）：電池生產商嘅龍頭，45-50%市佔率，嚟緊應該會去打入去歐洲市場

先導智能（300450）：中國唯一一間可以提供晒所有整電池嘅機器，同寧德時代嘅關係越嚟越密切，同樣準備打入歐洲

璞泰來（603659）：環球第二大anode嘅供應商，供貨俾Samsung，LG Chem，寧德時代，Anode喺電池入邊嘅competitive edge比較大，因為頭幾間嘅市佔率好高

恩捷股份（002812）：主要係做電池入邊嘅seperator，去到2H21應該都係供應唔夠，佢嘅市佔率由2016年9%短時間升到而家嘅40%，成個行業開始變到oligopoly，佢亦都供貨比Tesla

格林美（002340）：主要係提供電池嘅原材料，寧德時代嘅頭號supplier，同好多cathode/電池生產商有好深嘅關係（呢隻都幾搞笑， 11月頭出咗個好差嘅業績，跌咗落去$4.5，跟住嗰個時候研究緊電池supply chain，急急腳買咗先，估唔到係最後一跌⋯）

其實電動車嘅爭霸戰啱啱先開始，電動三寶可唔可以繼續落去，傳統車廠點樣打返轉頭，全部都係未知之數，但係無論結果係點，都希望大家都至少用下個「鏟」