中海油嘅錯價

自從美國國防部列出35間中國軍事企業，禁止ETF同埋指數基金投資佢哋，中海油身為其中一間，喺11月尾開始被拋售，但呢個可能係中長線嘅投資機會：

1）同上次美國制裁俄侶（486 HK）唔同，美國今次冇直接影響中海油嘅業務，即使有嘅話，美國業務好似只係佔5%（有錯請更正，呢個純粹係我腦入面嘅數據），同埋睇返個制裁嘅文件，其實主要係影響中海油嘅母公司，唔係上市果一部份，但係相信唔少投資者（尤其係美國投資者）都唔想承擔風險，話晒而家咁多嘢投資，所以沽咗先算。

2）當美國投資者放貨，咁邊個接貨呢？其中一個比較significant嘅係北水接貨，總共接咗嘅數量都唔細。睇返深港通同滬港通嘅數據，內地資金嘅佔比係呢個月大幅增加，有興趣可以睇吓David Webb嘅網站，佢綜合得好好，北水有兩條水，分別係A00003同埋A00004。

3）以估值嘅角度嚟睇，北水接貨其實都有道理。如果睇返中長線，等政治因素慢慢淡化，同埋美國投資者放晒要放嘅貨之後，係減少沽壓嘅情況下股價絕對有機會回復返去內在價值。而中海油嘅內在價值算係比較少分歧，因為佢同油價嘅correlation好高，以而家油價喺$50附近，中海油嘅內在價值應該都係$10左右。