反轉再反轉

話說前日講完話買中國聯通(762),第二日就出咗事,紐約交易所嘅做法反轉再反轉,本來其實都冇乜事,因為買嘅時候都唔係一時衝動(成個諗法可以睇返之前篇文),本來諗住只係美國ADR嗰邊嘅技術性沽壓,對我哋呢邊嘅影響有限度,但係今朝六點起身開機睇嘢,見到MSCI話要將三間電訊公司剔除,咁就麻煩啲。

開市前見到聯通跌緊15%,都幾誇張!首先計一計自己輸幾多錢,OK,未死得,痛但係唔致命;下一步,再睇返自己買入嘅conviction,基本嘅情況無變(At least唔係影響成間公司嘅業務),但係沽壓會比預期大好多(MSCI所衍生嘅沽壓同ADR除牌唔同),所以要面對嘅問題係點樣頂住短期嘅股價下跌,因為中長線理論上仲係冇乜問題;最後一步,既然已經跌咗15%,即時放貨唔會慳得幾多(given that我想繼續賭落去),同埋諗緊北水/阿爺有機會支持,甚至本地嘅投資者係呢個位應該會接貨(如果我無貨,我都會今日入第一轉),所以最後決定一開市唔放貨。等佢反彈到全日高位嘅時候,我都決定減一部份持倉,因為覺得當中嘅政治因素比預期多左少少,所以減低少少整體投資額有助渡過之後一段時間嘅波幅(同時間依家咁多好嘢買,轉少少錢去另一個投資項目都唔錯)

雖然今次嘅事件令我暫時有所損失,但係成盤棋局啱啱先開始,未到最後都未分出勝負!其實睇返轉頭美國雖然希望透過呢個操作打擊中國,短期可以將股價推落去,但係今次的操作對美國投資者嘅影響最大,之前佢哋咁多年買落嘅電訊股要被迫喺咁低位放貨,而非美國資金亦都可以喺呢個位做一個中長線嘅部署,完全係一個贏粒糖輸間廠嘅情況。相反,如果同一招真係用落去騰訊同阿里巴巴,情況會有趣好多。

根據我所知,其實有唔少美國投資者係唔想係呢個位放貨,有啲甚至希望透過唔係美國所控制嘅公司去繼續持有中國嘅電訊股(有會計師朋友分析當中嘅風險唔細)。如果你想撈底,以一個中長線嘅思維去投資應該冇乜問題,最緊要選擇一個自己舒服嘅投資額。

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s

%d 位部落客按了讚: