相信係香港，好多人都鍾意打麻雀，技術亦都非常高超。之前有朋友同我討論佢同其他人打開麻雀，大家不嬲都係鍾意做牌去到七番八番先食餬。但係自從多咗一個新人加入，三番就急急腳食餬，仲要好快就棄糊。咁樣令到其他人都要跟住佢做三番牌，因為做大牌一係就食唔出、一係仲有機會出沖，咁樣嘅情況一直持續到嗰位新人走咗先回復翻以前嘅打法。其實麻雀來來去去都係嗰百幾隻，但係由於玩家唔同，打發都因此不同。
其實由制裁開始，我都喺度思考緊玩家嘅改變會點樣影響估值，AH股之所以定價唔同，係因為對住同一間公司例如中鐵建，美國投資者會聚焦喺現金流嘅問題而俾一個低估值，內地投資者無咁擔心現金流，聚焦返係增長幅度，所以願意比一個高啲嘅估值。而透過制裁，嗰位三番嘅玩家俾人請離場，剩低嘅只有鍾意打七番八番嘅玩家。當然，有人會諗本地投資者應該都係傾向美國嘅估值方法？但係望住北水最近每日滔滔不絕咁樣掃貨，而估值呢樣野其實同藝術品一樣，都係睇市場大部份嘅人點睇佢嘅價值，剩低嘅人會係堅決繼續打三番，定係打返七番八番？
弩飛投資 