如何坐快車？

近排港股升到痴咗線，好多人都揸住大量嘅貨，甚至借埋孖展日日將PnL推上去（路飛都有120%倉位，PnL都好好彩已經過咗上年）。大家都好似坐緊係一㗎超高速移動嘅跑車，但係其實心目中都諗緊應該幾時落車，唔想出事嘅時候撞到粉身碎骨。

對於幾時落車，其實冇乜特定嘅方法，有人會提早落車，跟住以後唔睇股票；有人見到開始剎車，就落定車先。我喺呢度純粹分享自己嘅做法同諗法（唔代表一定啱）：首先，我就預咗斷左隻手，即係話普通嘅剎車我係唔會落車，因為唔夠痛，要真係第一次撞車之後，斷住隻手咁落車。因為根據多次嘅經驗，你提早落車其實會忍唔住上返車，最後同樣結果都係斷手落車，中間仲要賺少咗。

其實落車嘅精髓係當你斷左隻手落車之後，唔好諗住再上返車搵返隻手，跟住最後斷埋隻腳，瘋瘋癲癲咁樣YOLO踩盡油衝完一次之後，就唔好再博命啦！

最後，你會問乜嘢先為之斷左隻手，其實對於每一個人都有佢嘅數字，我就係單日PnL跌咗3-4%左右，但係對於好多人可能係7-10%。至於點樣量度呢個數字，其實可以用你嘅感覺：如果跌嘅時候你覺得好嬲，或者好唔開心，呢個只係普通嘅「剎車」，「斷手」嗰一下係跌到你靈魂出竅，唔識嬲亦都唔會感到唔開心，成個人變咗空洞咁樣，望一望個窗唔明點解個世界咁平靜，咁你就差唔多要放貨啦。