話說自從上次寫完「如何坐快車？」之後，呢兩日好多人問我：「點啊，隻手斷咗未？」，仲有好友特登send番胡迪喺Toy Story入面斷手嘅場面俾我睇！
今次新經濟股大跌嘅緣由主要係CT10（10年期國債利率）升到去1.3%，觸發大家對經濟增長同通脹預期對新經濟股估值嘅影響。再加埋喺牛年開始之前，中港兩地大家都炒上去諗住比對方接貨，但係世事豈能盡如人意呢？人哋唔接貨，自己就人踩人急急腳放返啲貨⋯至於央行流動性短期收縮唔係好大影響，因為新年之前央行好似平時咁樣放多少少，發現大家唔使用，所以就收返佢。
至於路飛斷咗手未，情況都好有趣：以PnL跌落去嘅情況，其實都幾痛下，但係我唔單止冇空洞嘅感覺，連少少唔開心或者憤怒嘅感覺都冇。我有諗過自己係咪麻木咗，但又好似唔係，應該係有少少預咗個調整會係咁上下，同埋今年嘅盈利有足夠嘅buffer，所以當個市跌落嚟嘅時候，仲有心情去感受嗰個痛楚。
喺感受痛楚嘅時候，我發現一直揸住嘅石油同埋電訊股嘅抗跌力好強，跟住覺得CT10可以係新舊轉換嘅一個catalyst，跟住今朝開始研究舊經濟有乜嘢機會，發現紙業已經升到上天，至於銀行、保險同證券情況仲係麻麻地，但係水泥同埋電訊開始有成交支持。所以呢一兩日沽左20%嘅新經濟，就將佢轉晒落去水泥同電訊：
水泥今年南方嘅行情最好，所以我最鍾意華潤水泥（1313），但係好公司唔一定升得最多，海螺水泥（914）係龍頭，中國建材（3323）又係散戶最愛，小孩才做選擇，大人全都要。
至於電訊，同樣我最鍾意中國聯通（762），由制裁開始揸到而家，今日加第二注，投行好鍾意中國電信（728），散戶鍾意中國移動（941），路飛係大人，所以都係殺曬全部。
In a nutshell，今次CT10當頭棒喝左我一下，發現雙軌行車（新舊經濟都買）的確有佢可取之處，尤其係經濟開始復甦嘅情況，所以透過今次調整，我將個盤嘅新舊比例由9:1調整到7:3，睇埋星期一開市再決定會唔會繼續調整成個比例。
弩飛投資 