CT10引發嘅輪動

新經濟由上年開始可以不停向上，甚至抱團，主要有兩個原因：
1）長期國債利率（CT10)係極低水平，導致計算新經濟估值嘅discount rate非常低
2）疫症問題未能處理，大家對經濟增長嘅預期有疑問

由於最近CT10衝上去，加埋疫症增加嘅數量不停向下，引發新舊經濟輪動，路飛覺得呢個係中長線嘅情況，已經構成新嘅趨勢，唔係咁容易轉變。雖然CT10可能會調番啲，但係有機會持續喺呢個水平上下浮沉，CT10始終係大家對未來經濟同通脹嘅預期，唔係放水可以壓得落去嘅嘢。

如果睇返今年年初到而家嘅股價走勢，有唔少舊經濟跑贏新經濟，所以即使未來雙方嘅升幅一樣，但係由於CT10嘅升幅，新經濟嘅下行風險比舊經濟高（舉個例，以前新舊經濟嘅預期升跌幅度分別係2:1同埋1:1，而家轉變咗做1:2同埋1:1）

對於短炒嘅人，市場會進入混亂嘅情況，因為唔同嘅人對未來進行緊不同嘅部署，要等待混沌期過度先有方向，現時好難去sense整體做緊乜嘢，因為已經唔似之前有「整體」行動嘅情況。

以前嘅智慧係等到大部份人放晒貨，就會跌完，但係而家唔係咁樣，因為倉位大升大跌非常容易，反而係等到大部份人嘅信念開始改變，情況先會改變。

由於risk return大幅改變，我相信一部份資金會從新經濟流去舊經濟，問題係之後會唔會造成一個全面嘅risk off，令到啲錢流入去債券市場，呢個要睇多陣先知。

見到有舊經濟嘅估值開始出現偏差，離開咗過往10年嘅幅度（舉個例，澳門股已經突破左pre-covid嘅估值，資源股更加犀利），所以舊經濟而家反映緊嘅唔單只係經濟上嘅改變，連discount rate所引伸的估值提升開始反映出嚟（CT10雖然近排向上，但相比covid前都係低位）

原先諗住只係放晒用TAM/DCF計算估值嘅股票，因為佢哋對discount rate嘅變動最敏感，今日開始連GARP嘅股票都有啲異樣⋯令我對市夢率嘅股票更有戒心

至於路飛嘅操作，近排呢幾日就係不停地轉倉，一反彈就沽新經濟，一跌就買舊經濟，已經轉到差唔多全部都變晒舊經濟（望住三四十隻愛股變晒其他嘢，有啲感觸）。如果今次嘅跌落係斬落嚟嘅刀，第一下就硬食咗，之後幾下就掂到少少劍氣。所以隻手斷咗一半之後，你都可以當我落咗車或者轉左車。但其實我唔係諗住進取再搏多啲，只係希望守住盈利，渡過呢一劫。

依家主要揸住電訊、石油、基建、資源、水泥、銀行⋯

以上只係我嘅一啲觀察同埋諗法，冇話一定啱或者錯，歡迎大家討論一下！