回歸清倉派

之前諗住有機會板塊輪動，諗住有機會由新經濟轉去舊經濟，所以即使加番去五成倉，都係以本地/內地銀行同ETF為主，始終冇乜買新經濟，但係近排發生咗幾樣野，所以決定都係回歸清倉派。

最近一次10年期嘅債息調整，我本來諗住科技股會反彈同埋銀行會調整，但係竟然啱啱相反：科技股繼續跌，銀行企得硬正，同預期有啲出入（Note：我買咗7288嘅同時買咗1/3份量嘅7552對沖走科技嘅部份），所以我開始懷疑CT10只不過係催化劑，而唔係實質原因（即使你睇Nasdaq嘅影響都冇咁大），我哋面對緊嘅唔係sector rotation，而係risk off。

CT10上升，除咗殺新經濟估值，最大影響係影響資金流動，投資者有機會將啲錢搬返去美元，對EM造成衝擊。其實，美國可以好似日本或者泰國咁樣做operational twist，但係即使CT10上升，其實對美股嘅影響不太大，所以Fed完全唔急住做，甚至連SLR都唔續期。中國政府其實都有所準備，已經提早「壓血」，三月開始收緊流動性，防止火上加油，減低受資金流走嘅影響。喺雙層壓力嘅情況下，因此就連舊經濟都頂唔住（今日連飛機、澳門、原材料都大跌）。

拜登上場之後嘅政治格局開始明顯，唔同國家嘅反應開始變得清晰，中國亦都採取相應措施，但係政治野我唔喺呢度講太多。

今次second leg出擊唔算成功（冇辦法，都係跟返discipline去做），但係慶幸唔係好傷，因為已經用咗最低風險嘅股票去博。

尋日特登go through返過往咁多年嘅trade record，覺得而家個情況同2018年極之相似，仲記得嗰一年升完之後極之難玩，用咗好多心機先贏番少少，但係壓力超大，exactly係之前寫嘅「清晰的混沌期」（唔係贏唔到錢，係非常辛苦姐）。所以上年辛苦左一年，係時候對自己好啲，攬住啲profit，好好休息吓。