更新咗嘅趨勢樣板分布

啱啱有讀者提議更新下趨勢樣板嘅分布，我覺得提議非常好，自己都想參考一下，睇吓成個新經濟股推動嘅牛市結束咗未⋯

第一次推介呢個分布圖嘅時候，嗰時個市升到爆炸，大家都好擔心隨時見頂，當時我嘅諗法係：「當個指數6+7嘅部份去到30-40%嘅時候，基本上都已經係牛市，之後有兩個可能性，一係維持喺30-40%，呢個牛市可以持續多一段時間，就好似2017年；一係繼續爆上去60%，即係雞犬皆升嘅情況，咁就差唔多炒爆，就好似2012年/2015年嘅情況⋯依家啱啱係40%附近，睇吓會去邊個情況，我就當然希望維持喺40%，炒多一年，但係結果係點有待跟進⋯」

而家個情況非常有趣，正正係爆咗啲又唔爆啲，繼續維持喺40%附近，好令人懷疑牛市係咪真正完結，有機會啲資金只係轉左去新嘅股票。以前真係爆破嘅話，應該係先衝上去60%，跌落去嘅時候非常凶狠，頭也不回。但係由於確定性唔高，我係呢個位都係揸住半倉，繼續摸住石頭過河⋯