中國SaaS最新諗法

自從上一轉新經濟殺估值之後，都唔少行業已經上返高位（例如電動車零件，醫藥），而SaaS係比較慘淡嘅行業，繼續喺低位徘徊，所以呢排決定revisit一下，重新審視SaaS係咪真係玩完（睇圖表仲要幾靚添）

米高·波特（Michael Porter）嘅定位學派，認為戰略只有三種（Porter’s Generic Strategies）：總成本領先（Cost Leadership)、差異化(Differentiation)、聚焦（Focus），而選擇嘅其中一樣就係定位。通常行業老大嘅定位係總成本領先，而老二嘅定位係差異化。係SaaS嘅行業入面，相信老大會來自橫向SaaS，而老二會來垂直SaaS（注：根據美國嘅經驗，通常橫向SaaS嘅市值同估值（PS）都高過垂直SaaS。）

要成為SaaS的老大，贏出嘅公司必須到達一定程度的規模，才能有成本領先優勢。但由於SaaS係採用隨用隨付制，所以用戶嘅粘性成為一個關鍵嘅指標。值得留意嘅係，SaaS嘅模式非常適合中小型企業，亦都食正中小企需要以較低成本將業務數字化嘅趨勢，所以之前做到急速嘅增長。但正正由於中小企運用嘅靈活性，佢哋嘅粘性相對大企業較低（例如有可能為咗平啲，選擇功能性差少少嘅服務），至於有幾低，近排有贊（8083）係快手（1024）嘅衝擊之下，增長率急速下降，市場先發現原來所謂嘅粘性可以係咁不堪一擊⋯所以當而家未有肯定嘅老大出現之前，提供差異化同以大企為主要目標群嘅SaaS公司，似係確定性比較高嘅投資機會：例如為內房提供SaaS嘅明源雲（909）或者版權保護SaaS嘅阜博（3738）。

至於科網巨企會唔會插隻腳入去SaaS嘅行業，直接打低現存嘅企業，答案係否定嘅。睇完巨企過去一段時間嘅部署，其實佢哋比較注重建設SaaS嘅平台，俾提供SaaS嘅公司使用，而唔係自己直接落手落腳去做。此外，佢哋寧願透過投資一系列嘅SaaS公司，去揸住具有增長前景嘅細分行業，將大量第三方嘅SaaS融入自己嘅系統入面。

P.S. 如果想refresh吓乜嘢係SaaS，可以睇番富L/窮S戒窮進化筆記，入面深入淺出解釋返成個SaaS行業嘅結構，以下係link：

電商SaaS賽道（微盟、有贊）[Part-1]
https://www.facebook.com/richlpoors/posts/180634980117815/

電商SaaS賽道（微盟vs有贊詳細比較）[Part-2]
https://www.facebook.com/richlpoors/posts/184270669754246/