其實自從好耐之前睇過一篇蔡金強（Oscar Choi，人尊稱為小金人）寫房地產嘅投資心法（搵主題、估值方法、流動性嘅關係等），背後嘅邏輯非常有深度，再加埋佢幽默嘅講嘢方法，所以長期留意佢嘅報告同埋評論，係一個我非常敬仰嘅前輩！（之後開始跟住佢嘅思維去投資內房嘅股票，係過往幾個樓市周期都有唔錯嘅進帳）所以當我係天窗嘅網站見到小金人嘅新書同簽名會之後，心情非常興奮，有機會見到「偶像」！
本來諗住做一個普通嘅小粉絲，但係非常感謝天窗嘅同事介紹我比小金人，等我有機會同佢傾吓計，其中有兩個topic印象最深刻：
1）知識面要寬闊小金人提到佢本書幾萬字，其實只係用咗四日就寫完（我本書前後寫咗六個月⋯），至於點解可以喺咁短時間寫咁多嘢，佢認為投資嘅人需要有非常寬闊嘅知識面，當唔同嘅範疇cross link埋一齊嘅時候，腦裏就會浮現大量嘅insights。
2）回饋老人家小金人亦都提到，近排做咗幾次為老人家籌款嘅慈善演講，尤其係無屋企人照顧同腦退化嘅老人家。我都非常認同呢個睇法，當我哋係股市炒炒賣賣，受惠於科技發展，我諗翻起近排喺大家樂食嘢，見到有唔少老人家喺度填紙，而唔識用app黎填表，突然醒覺科技發展並唔係平均受益每一個人。
權益披露：筆者持有一本簽咗名嘅《順流逆流—投資心法》，不會隨時買入沽出
弩飛投資 