跌破28000之後

自從跌穿28,000之後，多咗投資者認為市場將會開始爆邊。背後嘅原因，我認為而家係兩度力量喺度拉鋸緊：一邊係中國嘅整體流動性方向（負面），另一邊係公司盈利趨勢（正面）

對於上星期五人民銀行下調存款準備金率（RRR），我覺得唔代表整體嘅流動性方向係寬鬆左，而比較似係短期嘅寬鬆（係一萬億人民幣放水入面，有四千億要還15/7到期嘅MLF），但亦都令到市場懷疑「經濟嘅下行係咪比預期嚴重」。此外，近排原材料價格大升，短期寬鬆可以減輕下中小企嘅壓力，但係政府最後都係想要consolidation。

盈利趨勢方面，唔同嘅行業會有好大嘅分歧：
1) 大醫療冇問題，盈利增長非常強勁同清晰，只不過估值貴咗啲；
2) 電動車同樣冇問題，本地同國內嘅需求都強勁；
3) 新能源嚟緊有催化劑（碳排放權交易市場星期五就開始），而且太陽能嘅多晶硅價錢有機會見頂，令到需求翻返嚟；
4) 消費板塊（例如白色家電，小家電嗰啲）其實今次業績有機會有驚喜，因為好多嘅股價都因為原材料上升所以調整左，若果龍頭企業可以將加價壓力轉比消費者，相信係一個正面催化劑
5) 內房到咗業績期，大家都係炒一轉物管㗎喇，內房繼續比政策打壓住，應該未咁快ok
6) 分歧最大嘅係兩個周期性行業（原材料同埋航運），有人覺得係supercycle，冇咁快完（因為supply side嘅國家繼續爆covid，船隻未咁快起得切，詳細情況可以睇蔡金強最新嘅著作-順流逆流投資心法）；亦有人覺得係短暫cycle，隨着中國嘅經濟係流動性減弱嘅情況下唔係急住復甦，有demand side壓住。最後結果係點，木宰羊？

後記1：其實戴維斯雙殺邊有咁易，依家啲股票一係有盈利增長但係貴，一係冇乜嘢盈利增長但係平，盈利增長同埋估值，各選其一（科技股平番好多，中長線機會？）

後記2：其實啱啱跌八百點嗰日，好幸運係有賺錢嘅，一嚟已經走晒啲科技股，二嚟剩低嘅股票都好比力（中升，隆基，恩捷），諗住睇埋呢一兩日個反彈力有幾強，再決定會唔會重新入市（暫時唔係好急嘅）

P.S. 書展等我搵小金人簽番個名先！