自從上個星期寫嘅「金融戰嘅猜想」之後，大市向下突破，調整左差唔多2500點，而新經濟/增長股調整嘅幅度更加誇張，好多單日都跌10%以上。幸好弩飛比較保守，加上7500嘅幫助，整體回報跌咗1%左右。
係呢幾日內，環球嘅投資者都對中國嘅政策方向產生恐懼，導致中國同香港嘅equity risk premium向上，再次殺估值，因此新經濟/增長股調整特別犀利。睇睇各方投資者嘅部署：ARKK差唔多沽清中概科技股，甚至連一向buy on dips嘅北水都沽貨，傳聞好似又有基金爆煲斬倉，而且美國有機會限制買賣中港股票⋯而今日我決定入1/6嘅貨（啱啱好16.6%倉位）。
通常我以前買貨都會分為三個部份：第一隻腳買1/3、第二隻腳買1/3、突破後買1/3，但係後尾發現第一隻腳都係買得太多，容易因為虧損影響判斷，所以改變左買入嘅weighting：第一隻腳買1/6，第二隻腳買3/6，突破後買2/6。
好多人會問：好似買得快咗啲喎，會唔會太早入？其實都有可能嘅，但係通常優質股都比指數提早見底（亦都比指數較遲見頂），若果用「特斯拉閥」嘅方法去睇，有幾隻股票值得提早少少買入，咁當然再跌返10-15%都係有可能（但係我計過呢個係可以承受嘅損失，所以可以接受），而且暫時都會繼續strong hold 7500。
係我心目中有四個比較大機會出現嘅情景，所以準備咗唔同解決方案：
1）強勢股調整喺10-15%以內，指數繼續跌：大概率嘅情況，咁我會喺第二隻腳買入3/6嘅注碼
2）強勢股調整多過10-15%，指數繼續跌：首先睇吓係唔係行業specific嘅問題，如果只係單純再沉底，可以考慮再買1/6，但係將第二隻腳嘅注碼改為2/6，亦都會沽期指減少損失（唔會用7500，因為7500係用來做啲大型啲嘅波幅，容易啲揸耐啲，而期指嘅機動性大啲）
3）指數升，強勢股升：通常強勢股嘅升幅都會超過指數，所以搵日指數調整，移除7500嘅對沖
4）指數升，但係強勢股調整得多：比較極端嘅情況，情況都幾差，可能諗錯野，有機會繼續risk off，重新部署
至於點解今日買貨，先撇除基本面同技術面唔講，其實主要係平衡返個心理質素：因為之前當市場對方向係一半一半嘅時候，我係睇得比較淡，幸好避開咗一劫；但當而家市場大部份人都轉淡嘅時候，我希望自己睇得比較中立，因為揸住空倉嘅時候，通常睇親嘅嘢都比較負面，而買返少少野嘅之後，會強迫自己睇返正反兩方面嘅嘢。
（圖：路飛嘅朋友索隆嘗試空手接刀，但係失敗咗⋯)
弩飛投資 