價值股強勢歸來

雖然大家都希望可以搵一啲戴維斯雙殺嘅公司（即係同時擁有盈利增長同埋估值向上），但係呢啲情況通常都只係出現喺股災之後，大部份時間都係兩樣揀一樣：一係高估值嘅增長股，食佢盈利增長；一係低估值嘅價值股，食佢估值修復。而係《發掘超強港股》入面既回測發現，過往10年資金大部份時間都係揀前者，始終係大水灌溉嘅平資金下，更有利增長股。

但係呢個資金配置嘅態度，係中期有機會改變。隨着中國政府改變國策，從「效率」調整到「公平」，從「美國模式」轉為「德國模式」，從「軟科技」改為扶持「硬科技」，令到唔少上年炒開嘅高估值增長股出現「政策打壓」嘅估值下行風險。(而家吹緊風話下一轉係醫療相關嘅公司，所以我都止賺咗第一隻腳入貨嘅醫療股。) 君子不立危牆之下，相信一部份必須投資係中國嘅資金，會將資金從高估值高增長嘅行業park cash到低估值低風險嘅行業。對於投資者來講，最緊要係睇risk adjusted return，當中嘅risk係指未來嘅風險，而非過往嘅volatility，當risk增大咗好多，risk adjusted return便會縮細。

其實呢個情況都好配合政府長遠發展嘅思路，政府希望「公平」，其實係想成個經濟體同步發展，而非側重喺一邊。之前嗰幾年，新經濟相對舊經濟更加容易獲得資金嘅興趣，無論新經濟估值有幾貴，舊經濟估值有幾平，資金都係一面倒支持新經濟行業嘅增長。一線新經濟喺資金嘅支持下大力發展，三四線新經濟亦都喺大潮流入面濫竽充數。到咗而家，一線新經濟已經成長到可以讓利嘅階段，政府亦唔想見到資金流去三四線新經濟浪費資源。

相反其實舊經濟同樣有集資嘅需要，而且有一部份都努力尋找新嘅增長點（例如煤電加多咗可再生能源嘅業務，電訊股多咗5G、數據中心、雲服務等），但價值股嘅估值喺缺乏資金支持下持續向下，因此業務亦都較難發展。睇返近排嘅業績同政策方向，唔排除政府希望支持一下舊經濟嘅發展（例如今次政府批准電訊商嘅5G加價，都係最近嘅業績反映咗出嚟，而非好似4G時代，為咗增加大眾普及率，而限制4G嘅收費）

至於近排嘅操作：自從七月尾開始加倉，第二隻腳嘅入貨計劃亦都因應市況作出改變。隨着增長股嘅弱勢同價值股嘅強勢，弩飛入貨嘅偏好由原先嘅醫藥、汽車經銷商、運動服裝、IT（都有係$450撈左第一注騰訊、$210撈美團嘅⋯幸好都唔使輸錢），第二隻腳轉為入銀行、重型器械、電力、電訊，雖然倉位去到七八成，但現時佔咗大比重嘅舊經濟持倉一直處於升多跌小、陽盛陰衰嘅狀態，相對揸得比較舒服。

後記：話說去兄弟屋企食飯飲sake打機，言談之間發現大家都買晒郵儲銀行，interesting⋯

利申：現時最新重倉就係郵儲銀行（1658），希望業績唔錯啦