對於近排大市跌、增長股大跌，開始越來越多投資人認為今年嘅走勢似2018年嘅情況，睇淡嘅聲音越來越多。（小小回顧：弩飛今年三月寫嘅「進入清晰嘅混沌期」同「回歸清倉派」初次提到今年嘅走勢會似2018年，亦都係七月寫嘅「金融戰嘅猜想」解釋兩者相似嘅原因，有興趣可以睇番！）
面對咁樣嘅市況，最簡單嘅方法當然係清倉離場，減低損失。但係由於我認為今次跌市，資金需要重新配置，所以選擇咗一個平行時空嘅做法：當大部份人分析應該繼續沽高估值增長股，定係中長線開始入場部署，我決定尋找具增長潛力嘅價值股，現時主要係內銀、重型機械、電力、電訊，高估值增長股只剩低運動服裝。
其實每次跌市都係審視自己portfolio嘅最好機會，我經常覺得一隻好股票並唔係升得有幾多，而係跌得有幾少。係經歷咗近排幾個升跌之後，有幾個新嘅感受：
1）原本諗住政府會透過谷基建去支持經濟，所以買咗重型器械（至少已經跌返去合理估值，同埋每次都係佢哋升最多），但係始終佢哋Q3個業績會麻麻哋，所以即使有sexy嘅增長概念，佢哋近排嘅走勢反而冇水泥行業咁紮實（水泥嚟緊即將進入旺季，庫存開始減少，價格應該會升），所以弩飛已經減咗大部份持倉再觀察（有一部份仲要損手離場⋯)
2）大量買入郵署銀行同招商銀行嘅原因，係相信佢哋嘅本業係降RRR嘅情況下會做得唔錯。例如招商近排出嘅業績，中高端客戶資產管理優勢強化，我幾鍾意呢個生意模式，但係估唔到近排證券行業反而爆升得更加犀利⋯
3）今次都幾幸運，為咗避開中概股（原先諗住打金融戰），第一隻腳入得比較多醫藥、新能源、電動車板塊。後來理解到政府「公平」嘅操作，覺得剩低嘅高估值新經濟有機會殺一轉估值，所以走哂所有醫藥同電動車（連最愛嘅藥明生物同恩捷都走晒），轉去價值股，幸好再避多一劫⋯今日放曬所有運動服止賺10-20%。
4）朋友問依家係咪第二隻腳，其實增長股同價值股係完全唔同情況⋯增長股好多已經下破上一低位，呢啲正確來講叫做「跌穿」，「第二隻腳」通常係高過第一低位；價值股暫時好似只有調整，冇乜第二隻腳嘅情況。但係我非常擔心會唔會開始咗risk off嘅狀態，因為我發現即使搵到幾個hold住嘅行業，但係只要有一兩間公司嘅走勢比預期差（例如中聯重科同三一），對盈利嘅負面影響都比較大，所以呢一兩日都減倉到三成，主要剩低銀行、電力同埋電訊（今日中聯通出業績，希望有啲睇頭）
最後，等我post吓每一個行業我最重倉嗰隻股票，大家就會明白點解有平行時空嘅感覺，令到我之前加倉到七成：
銀行：郵儲銀行（1658）
電力：中國電力（2380）
重型機械：濰柴動力（2338）
電訊：中國聯通（762）
但係為咗防範風險，正所謂「凡事去得太盡，緣份定必早盡」，之前打到上咁大嘅倉位都冇輸太多，都係先收一收，避一避風頭先⋯
弩飛投資 