重倉是果不是因

雖然而家嘅主線都係揸住三成倉位銀行、電力同埋電訊做中線部署,但係上星期五都買咗兩成增長股短炒搏反彈,因為相信個市有機會反彈1500點,費事自己係升咗兩棍之後先夾硬追貨。

今次追嘅主要都係各行業嘅龍頭:IT嘅美團(3690),CRO嘅藥明生物(2269)(好彩撞正好業績),物管嘅碧桂園服務(6098),但係都會用hit and run嘅方法,反彈到冇力就止賺。Trader朋友更加犀利,一隻7226搞掂晒,唔使諗。

至於現時最重倉嘅係中國電力(2380)。

好多時候你會發現唔少投資者最重倉嘅股票係升得最多嘅,而跌咗落去嘅股票嘅倉位冇咁多,其實係自然現象:假設有三隻股票,全部買一萬蚊,一隻升咗10%,一隻跌咗10%,咁你最重倉嘅股票(一萬一千蚊)當然係升咗10%嗰隻,佢係升到變咗最重倉,唔一定係重倉完之後大升!相反,當公司嘅股價調整左,變相自動幫你減咗倉⋯ Anyways,中國電力係買完之後升咗>30%,所以佢嘅倉位比第二大持倉>30%,呢個係果、唔係因。

咁當然,比較有conviction嘅trade idea通常都會比較重倉,至於邊個最後成為第一大持倉,就要睇股票自己造化。

最後,啱啱睇返PnL,原來今個月(未計呢一兩日反彈)咁凶險都有正回報,主要係電力股一隻救全家,而其他價值股都冇乜大跌,都非常感恩,有機會就會寫返投資電力股嘅邏輯。

P.S. 近排一直都唔明東方證券(3958)同廣發證劵(1776)升乜嘢,因為證券行業通常同成交量/股市表現有關,但係股市氣氛好明顯普通,而且唔係成個行業一齊升,原來近排講緊「含基量」,即係含有優質基金嘅證券行喺度做緊revaluation,而東方同廣發明顯優勝好多(留意番,證券行業整體嘅資產管理AUM其實不停萎縮,所以我先投資招商銀行,當時認為佢做得比較好)

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s

%d 位部落客按了讚: