大跌審視好股票

每次跌市都係審視股票強弱嘅機會，因為可以睇到有持貨能力嘅資金會係反彈嘅時候率先買入乜嘢股票。

「反彈力」嘅計算方法係（收市價 – 全日低位）/ （昨日收市價 – 全日低位），目標係睇下午嘅反彈佔咗全日跌幅嘅佔比。簡單來講，例如今日大市最多跌1000點，然後反彈左200點（收跌800點），大市嘅「反彈力」就係200/1000 = 0.2。如果你手頭上嘅股票嘅「反彈力」大過0.2，其實已經跑贏大市。

「反彈力」嘅數值當然越高越好，所以我攞咗0.8以上嘅股票出嚟睇，表示大部份嘅跌幅都差唔多修復到（對於一啲今日完全冇跌過嘅股票，理論上「反彈力」係無限，但係我將佢設定為1.0）。

結果顯示，跟前文「沽清價值股，以醫藥股進攻」嘅推斷相似，若果有反彈，醫藥會係強勁嘅板塊。所以對於主要揸住醫藥股嘅我，雖然今日大跌市，都非常幸運PnL獲得正數（主要都係1801嘅功勞，同埋其實我得兩成貨）。剩低嘅強勢板塊，分別包括電力、新能源，而澳門賭業雖然上榜，相信只係超弱勢反彈，並非強勢板塊。