弗洛伊德·梅威瑟（前職業拳擊運動員，擁有五個世界冠軍，50場不敗紀錄）曾經提到拳擊運動嘅精髓係「Hit and not get hit」。聽落好似山係石頭海係水嘅道理，但係實行起上嚟並唔簡單：假設兩個體能完全相同嘅選手，係完全冇策略嘅情況下，打中對手同俾人打中嘅機會率其實都係五十五十，唔會有一面倒打到人又唔俾人打中嘅情況。
要改變呢個賠率，令到自己打中嘅機會率提升，同時減低被打中嘅機會，除咗加強身體質素，主要都係靠策略思維。我留意到策略通常有兩種：1）攞分贏比賽，2）KO對手結束比賽。雖然兩個結果都係贏，而兩種打法嘅目標同受壓程度唔同，我亦係當中睇到投資嘅概念。
1）攞分贏比賽
通常保持適當嘅距離，對手攻擊嘅時候作出閃避，亦係對手攻擊時失身位進行反擊攞分，增加打中相對被打中嘅機會率。投資上，做短期嘅投機者都係用呢個概念：選擇一個低風險嘅入場位，設定好止蝕位，保持紀律。錯方向（被對手攻擊）就盡快止蝕，啱方向就止賺或者放風箏等盈利滾落去。
2）KO對手結束比賽
將距離盡量拉近，甚至不介意被適量打中，但攻擊時的力度巨大而且位置準確，對對手造成嚴重傷害。投資上，做長期嘅投機者都係用呢個概念：如何係短期挨價嘅情況下（被對手打中），睇清楚公司嘅價值（攻擊位置），而且投入合適注碼，從而獲取「全壘打」嘅回報。當中嘅技巧同心理質素都比第一種打法要求更多，控制「重擊」與「被打」之間嘅平衡，而我認為「承受多少痛楚」係成個策略嘅關鍵。
至於邊一種打法好啲，其實都係睇投資者本人嘅能力圈，同埋當下市況決定：若果投資者比較risk averse或者鍾意技術分析，第一種打法比較適合，反之亦然；至於市況，牛皮市、熊市適合第一種打法，牛市適合第二種；資金大小、資金來源亦都影響合適嘅打法。
弩飛投資 