業績後加倉到八成

由於最近細女啱啱出世，同埋近排需要大量時間閱讀同做研究（例如課金睇「得到」嘅課程，讀完仲有證書添！），所以呢排都少咗寫嘢⋯

上一篇文《3Q業績期可能係最後一個調整》提到「雖然睇好，但係我覺得3Q業績有機會構成短期調整嘅壓力，所以會喺業績過後先再加大倉位。」眨吓眼，業績公布期過得差唔多，恆指亦都由26200調整到24500，幸好用咗7500做對沖加上一啲短炒嘅盈利（例如創維751），令到挨打嘅時期過得唔算咁辛苦。其實今次改變左入市策略：以前估計如果有超過1000點調整，通常會先減倉，調完先加倉；但過往幾次發現若果你買到唔錯嘅股票，佢唔一定調落去俾你低吸，今次手頭上嘅股票十隻有六七隻係打橫甚至向上。

後市睇法跟返上篇文，仍然係睇好嘅，主線係中美關係有機會改善，宜家呢個估值嘅值博率係唔錯嘅。從孟晚舟被釋放，到王毅、劉鶴同counterparty傾偈，再到兩國元首開視像會議，中美呢對難兄難弟，一個就「滯」、一個就「脹」，就睇吓佢哋有冇嘢傾到出嚟。

倉位方面，由幾日之前開始留意到有conviction嘅股票調整得差唔多（或者睇Terry Laundry嘅T理論，升跌嘅時間開始對稱），所以續步入貨，都差唔多去到八成（如果計埋兩倍指數嘅ETF，delta去到九成），7500都減咗一半，而Conviction主要分為五六條主線，下篇文可以寫下。PnL方面，其實有啲喜出望外：今日反彈之後結算，雖然恆指先啱啱突破返25000，但PnL已經升破26500嘅位，構成唔錯嘅防守力。

P.S. 雖然我係集中投資中港股票，但係近排都踩多咗入去美股同埋虛擬貨幣，始終賽道嘅斜度差太遠，長期嘅事倍功半嘅情況都逼得我要走出去。