3Q業績期可能係最後一個調整

由於上個月開始睇好後市，所以九月十月逐步加倉，到現時嘅六成倉位。雖然睇好，但係我覺得3Q業績有機會構成短期調整嘅壓力，所以會喺業績過後先再加大倉位。

3Q業績除咗受整體經濟下行拖累之外，高原材料格價影響都唔細，例如尋日有水泥同電力股因高煤價壓低左盈利。但係近排開始有跡象4Q原材料嘅壓力開始減弱，相信對之後嘅毛利率有機會反彈。

除咗短期嘅原材料因素之外，更大嘅原因係市場對「共同富裕」嘅理解變得更清晰：政府希望從「自主創新」轉為「專精特新」，希望企業幫手解決中國需要依賴國外技術嘅樽頸位；唔希望透過資本槓桿，協助企業野蠻生長，達到壟斷賺錢嘅目的，反而需要從profit driven嘅單一目的轉為多個目標（例：CSR，公平競爭，碳排放，安全問題）。

隨着市場對「共同富裕」嘅理解更深入，之前有一部份資金為咗安全起見，泊咗入去安全嘅國企有機會流返出嚟，去番中長線創造價值嘅企業。而我對「共同富裕」令到中小企有利嘅睇法都要作出更改，其實有一部份大型企業相比中小企更有實力去達到兼顧社會責任嘅目標，而同時間做埋盈利增長。