再度投資內房股

尋日篇文交代過我哋入咗大量嘅內房股，係因為無論FA定係TA，佢現時嘅值搏率都好高。係基本面方面，有幾個主要原因：

1）銷售數據做得好：睇返五月嘅數據，平均升左20%，主要係來自pent up demand，又有放鬆戶口嘅政策，甚至有地產商認為有機會追得返年初定下嘅目標。地區方面，一二線好過三四線，東邊亦都比較好。

2）足夠嘅流動性：今年內房發嘅人民幣債券發得比較輕鬆，息率唔使太高都攞到錢，所以大家搶地都比較aggressive，從而推高咗地價，亦都可以借勢推高銷售價。

3）估值平：都係睇返PE，NAV，息率，大部份嘅現價都處於平嘅水平，雖然唔係最平。但係由於佢哋嘅負債偏高，所以每個估值方法都要做返相應嘅adjustment。

呢度寫「再度」投資內房股，係因為其實上年八月至十二月已經投資過一次，收穫都唔錯，平均一間公司可以做到20-40%嘅利潤，幫我哋成個盤推高左唔少。估唔到係六個月之後，咁快就有機會再投資！

但係要小心嘅係，內房唔係一個咁簡單直接嘅行業，每一次嘅主題都唔同，而每一間公司嘅特性都唔同，而今次呢個浪所炒嘅公司同上次已經有唔同。