建立趨勢篩選模型

話說近排大巿不宜炒作（e.g. 今朝科技股一開市升4-5%，到收市跌1-2%，講真真係唔撈得幾多次底，好容易將過往幾個月嘅盈利輸返出去），所以路飛近排都係睇書同埋休息為主。

近排返睇緊一本舊書「走進我的交易室」（Come Into My Trading Room by Dr Alexander Elder)，入邊睇到一個「三螢幕」嘅系統，覺得幾有用，所以決定用彭博近排新出嘅技術分析language（i.e. BTH/BTP/BQL)寫下程式，整咗兩日，今日終於完成咗！

簡單來講，呢個程式係睇一隻股票嘅趨勢，跟住數量化咗佢，目的係第時我唔需要每隻股票逐張圖慢慢睇，淨係幾個數字就可以概括成個情況，就可以容易篩選，同埋仲會自動提醒我趨勢嘅情況(BTP係每秒都可以自動更新！）

程式入面嘅結構就唔多講啦（可能遲啲係luffyinvesting.com先寫返詳細情況），但係佢睇完一幅股價圖之後，就會判斷佢係上升趨勢定係下降趨勢，跟住再分類個趨勢係增強緊，定係減弱緊，或者係開始反轉，圖一就係入面嘅logic tree。其實我係程式入邊加埋判斷「中期停頓位」同埋「轉勢確定位」，呢個遲啲有用先講啦。

跟住我將香港股票最大嗰1000間上市公司放入個程式run，結果都好清楚：八成股票上升趨勢，兩成股票下降趨勢；但係上升趨勢入邊都有多個一半係開始轉差；而係下降趨勢入邊有一啲公司已經跌到七七八八，有少少轉勢嘅跡象？（例如國泰）