對疫症的新假設

現時市場嘅基本諗法：由於疫症影響經濟嘅基本面，喺大水灌溉嘅前提下，資金會追逐具增長/能見度高嘅新經濟股。大家預期隨着疫苗推出嘅機會率越高，環球回復「正常」嘅情況越接近，資金會由高估值嘅新經濟股流返去舊經濟股做返估值修補。（大部份投行嘅客戶都問緊呢個value / growth bifurcation嘅問題）

但係若果我哋假設「疫苗不能解決問題」，咁我哋而家面對緊乜嘢情況？首先，新經濟股嘅估值已經拉得好盡，差唔多92 percentile，睇返以前嘅數據係1994/ 2000/ 2007嗰啲泡沫年份先見到嘅估值，頭兩成最貴嘅股票已經係20年來嘅估值高位，而呢個估值喺未來6至12個月大部份機會都係負回報。

第二，好多國家已經用咗大量嘅monetary同埋fiscal policy去頂住個經濟，剩低嘅彈藥所余無幾（e.g. 美國唔單止用咗無限QE，Fed仲要將目標通脹率用average去計），如果而家先發現今次疫症其實係馬拉松，而唔係短跑，咁仲有冇力跑落去？

第三，而家最根本嘅經濟情況比三月時更加差，當各國嘅政府停止救濟嘅情況下，真實嘅基本面(失業率/銀行壞帳/公司倒閉 etc）就會現形。近排歐洲嗰邊嘅疫情情況再次反彈，特別係英國同埋荷蘭，所以會令投資者開始問：What if 會繼續有三四五六波？很多國家已經不能再lock-down了⋯

基於以上假設所引伸嘅情況，我哋繼續認為整體香港股票市場嘅值博率比較低（唔等於唔會反彈嘅），所以維持住兩成持倉（都係太陽能同埋一啲游擊嘅倉位）