中秋節後買貨（20% -> 60%）

沉寂左三個月之後（一直處於兩成貨，減少買賣），呢一兩日終於搵到入貨嘅機會（去到大約六成貨左右），主要係見到優質股調整嘅幅度已經足夠，同埋抗衡向下嘅力量開始增強。

用返「超級績效」第九章入面其中一句（近排好多人鍾意睇呢本書）：「百分之九十以上的超級強勢股，是在空頭市場或大盤修正過程展開攻勢。所以，當行情不好的時候，投資人就應該做好準備，等到行情啟動，務必要讓自己能夠隨時進場。」

基於呢一句，我喺中秋節嘅時候整咗個小小嘅「反彈模型」，主要係睇吓有冇港股係近排呢三個月嘅空頭市場展開攻勢，發現其實都有少少（太陽能/消費係其中一部份）。書入面有提到呢啲強勢股，會喺指數繼續向下嘅時候，已經開始慢慢向上，所以呢個「反彈模型」係睇吓每一隻股票嘅「反彈力」同指數嘅「反彈力」做對比。（Note: 由於假設左每一隻股票升跌嘅時候同大市嘅關係會唔同，所以唔會用beta做基調（Beta假設左升跌時嘅關係喺一樣))

估唔到新入嘅貨好快就有5-10%嘅水位（主要都係入IT同埋醫藥），其中波司登（3998）特別犀利（其實本來係想買李寧/安踏），兩日急升左20%，成個節奏同過往幾個月完全唔同，所以好快就買咗三次貨。Anyways，始終環球嘅波動性仍然存在，而且估值唔係好平，所以都好難好似三四月嘅時候放膽去買，但係而家都係抱住審慎樂觀嘅態度。