雖然恆指唔係好能夠表達大部份嘅股票，因為一直都係炒股唔炒市，但係暫時用住佢嚟表達我心目中對大市方向嘅諗法：當大市急速連升一個月，無論你睇乜嘢技術指標，全部都一致認為已經嚴重超買，咁當然超買之後可以繼續超買（而家呢個情況一啲都唔出奇，每日都發生緊），但係尋日人行嘅馬駿開始出嚟講嘢，講話股票同房地產市場開始有少少泡沫，之後雖然央行即刻話會繼續保持流動性，但係睇返近排嘅數據都有少少收水嘅表現，所以都明白政府希望要嘅始終係健康牛，而唔係瘋牛。
喺而家呢個位，有機會出現三個可能性：
1）綠色線，大市繼續爆上去，政府控制唔到，即係上一篇文嘅「趨勢樣板指數」佔6至7嘅比例升到上去60%，成個大市雞犬皆升，我覺得機會比較低，只有5-10%，因為政府有好多方法控制到。
2）紅色線，大市已經見頂，呢個機會都好低，因為基本上牛市已經走唔甩，全球只有中國嘅增長比較高，美金又繼續跌，跟住啲新經濟公司嘅盈利越嚟越穩定同有增長能力，所以向下嘅機會率亦都好抵，同樣只有5-10%。
3）黃色線，打橫發展上下波動，「趨勢樣板指數」佔6至7嘅比例繼續維持喺40%左右，等時間慢慢過，差嘅公司向下調整，強嘅公司輕微調整（因為近排出現超買，你睇騰訊美團一日升10%就知大件事）呢個機會率最高，我覺得有80-90%機會。
路飛嘅部署：成個一月都揸住130-140%倉衝上嚟，近排呢幾日出現只有波動沒有升幅嘅情況，所以將倉位減到得返60-80%。當中將偷雞嘅二三線股全部移除（460同2126偷雞成功，所以都已經take profit，其他未收成嘅，都唔搏啦），強勢股嘅分兩類：升咗上頂嘅斬2/3，未升上頂嘅斬1/3。
大家有咩部署呢？一齊討論下！
弩飛投資 