相信過咗呢個週末，大家都非常清楚上星期暴跌嘅原因。簡單來講，就係中國嘅政策方向由效率轉為公平（或者由「美國模式」轉為「德國模式」），所以好多之前有靚賽道嘅行業嘅盈利增長被封頂、能見度降低，嚟緊2C嘅行業會比2B嘅行業差，而「硬科技」將會得到更多嘅支持。詳細情況可以參考富L/窮S戒窮進化筆記最新嘅文章，佢哋解釋左成件事嘅來龍去脈，以下係link：https://www.facebook.com/106031060911541/posts/374537647394213/?d=n
如果以估值嘅角度黎睇，可以將DCF模型拆開嚟睇喺「效率轉為公平」嘅情況下，估值發生乜嘢改變：
首先，最先受到衝擊嘅部份係股權風險溢價（Equity Risk Premium，簡稱ERP），佢喺DCF分母嘅部份，當該股票風險越高嘅時候，ERP就越高，導致估值向下。由於一開始大家都未明白政府做緊乜嘢，只係見到政府不停出政策打壓唔同嘅行業，所以國家風險加行業風險同時增加，令到ERP大升，因此好多增長股都被殺估值，但隨着市場開始明白政府嘅取態，我相信ERP會開始回落。
第二，係終值（Terminal Value)嘅部份嘅改變，當「公平」成為主線，可以想像一個行業會提早到達增長嘅成熟期，而且成熟期嘅估值水平會比之前低，因為利潤有機會被壓縮。從呢一個方面嚟睇，相信未有盈利嘅公司會受到較大嘅下行壓力，一嚟終值對未有盈利嘅公司嘅估值佔比較有盈利嘅公司高；二嚟相信資金冇以前咁進取，願意等待一兩年，因為只要政策一變，等待嘅時間便會白白浪費咗。
下一篇文會講吓近排嘅操作，而家留意緊啲乜嘢股票，同埋大市嘅睇法（送完個女返學之後，應該有少少時間寫下嘢）
弩飛投資 