價值股逐一射火箭

當大部份人問緊「增長股幾時見底?」或者「大市幾時見底?」時,其實我哋應該先諗吓呢啲問題本身有冇問題,若果我哋企後啲睇,會發現唔少價值股已經逐一見底,而且射緊火箭。

首先講一講最新嘅部署,喺八月中寫嘅「價值股強勢歸來」同「平行時空嘅增長型價值股」入面嘅睇法,大方向冇乜變動,但係中間做咗啲調整(主要係基建方面)。現時揸得最重都係價值型股票,主力仍然係電力股同埋基建,而內銀、內險就小注部署住先。近排開始多咗投行講value rotation,我相信呢個情況會持續一段時間,而且最近北水都好似按住呢個思路去買貨。我估計會先由中小型行業開始(正常增長率,絕地嘅估值,例如電力、基建、水務),進行一輪估值修復(低位有機會反彈100-150%),企穩左之後資金再決定會唔會入大型行業(例如銀行、電訊、保險),同樣係做估值修復(低位有機會反彈40-50%)。由於市面嘅資金有限,估值修復嘅次序有先後、幅度有分別。

電力股方面,主要揸住中國電力(2380)同埋華潤電力(836),本來上個星期諗住寫篇文章講成個投資邏輯,但係最近都有好多投行報告寫咗唔同嘅原因:煤價有機會見頂,電價有機會10年內首次提升,電開始有商品化嘅屬性,受惠新國策等等。至於我買入嘅原因,原本想由成個歷史慢慢講,又「西電東送」、又「管住中間、放開兩頭」、發電/電網/配售嘅盈利分布喺49/33/14(而美國係65/10/25),但係簡單用一句話講,就係「政府容許發電商攞番啲盈利」,所以中線覺得有估值提升嘅空間。而買入嘅催化劑,就係政府近排提到唔建議急住phase out煤電,而係按部就班咁做,所以我就放膽買入。同埋睇埋估值嘅話,其實真係平得好離譜:簡單咁用SOTP去計PB,當時純太陽能/風電/水電嘅PB分別係3.0x/1.9x/2.6x,對於擁有三四成新能源capacity嘅中國電力同華潤電力來講,有大量估值提升嘅空間。

基建股方面,而家最重倉中國建築(3311)同埋中國中鐵(390),咁我都有順便買埋中鐵建(1186)同中交建(1800)。揀呢個行業嘅原因,同八月頭嘅諗法一樣:「放眼下半年,中國嘅三頭馬車之中(消費、出口、基建)有兩頭表現將會麻麻哋:消費方面,有調查發現大部份市民嚟緊都選擇增加儲蓄、減少消費;出口方面,中國提早脫離疫症影響所獲得嘅出口紅利,喺其他國家開始復工嘅情況下逐漸散去,所以要穩住經濟嘅話,其實最後都係靠基建,而地方政府發債高峰期相信會係Q3。」。今次出擊嘅問題係之前揀嘅重型器械冇預期表現得咁好,反而係鐵路/公路製造商嘅估值修復非常明顯。雖然中咗行業,但係副行業歪咗炮,所以即使遲咗少少,都唯有將資金調過去。諗翻轉頭都係嘅,雖然重型器械嘅技術含量高啲,但係睇嚟緊Q3/Q4嘅業績,應該會麻麻哋(因為好多需求已經係Q1/Q2消耗咗),相反鐵路/公路製造商Q3/Q4應該幾穩陣,對於多咗風險意識嘅資金梗係揀後者。

最後,除咗電力同基建之外,其實有唔少估值超低、有合理增長嘅小型行業最近都做緊估值修復,例如虎哥趨勢投資近排講嘅光大環境(257)同埋賈斯丁盤房 – 九十後收息與增長的創富之路之前講嘅金界(3918)都係同樣道理,有興趣可以參考吓佢哋嘅文章!

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s

%d 位部落客按了讚: